अगस्त महिनामा निकै चर्चा पाएको नयाँ पुस्ताको कृत्रिम मुटु शरीरमा प्रतिस्थापन गर्ने एक बिरामीले आइतबार एक अन्तर्वार्तामा आफू साइकल चलाउनसक्ने गरी निको भएको बताएका छन् । उनन्सत्तरी वर्षीय यी पुरुष अझै पनि अज्ञात रहन चाहन्छन् र फ्रान्सको पश्चिमी नगर नान्टसमा आठ महिना अगाडि यी व्यक्तिमा कृत्रिम मुटु प्रतिस्थापन गर्ने समयमा उनी मृत्युको नजिक पुग्ने गरी बिरामी थिए । फ्रान्सको संस्था कार्मटले कृत्रिम मुटु विकास गरेको र त्यसलाई परीक्षणका लागि पहिलो बिरामीमा प्रयोग गरेको विषयमा चिकै चर्चा भएको थियो । छयहत्तर वर्षका क्लड ड्यानीको गत वर्ष मृत्यु भएको थियो । ड्यानीमा कृत्रिम मुटु प्रतिस्थापन भएको १० सातामा उनको मृत्युभएको थियो । दोस्रो बिरामी भने त्यो भन्दा बढी बाँचेका छन् । उनलाई यसै वर्षको आरम्भमा घर पठाइएको थियो । आइतबार उनले शल्यक्रियापछिको पहिलो अन्तर्वार्तामा आफू निको भएको र सामान्य जीवन बाँचेको बताए । उनले आफू हिड्ने गरेको, ओछ्यानबाट उठ्ने गरेको र एक दिनमा कुनै पनि समस्या नभइकन १० देखि १५ पटक निहुरिने गरेको बताए । उनले आफ्नो सन्तुलन कायम गर्न सकेको र आफूलाई कुनै पनि डर नलागेको बताए । दुई सन्तानका यी पिताले यी जानकारी जेडीडी साप्ताहिकलाई दिएका हुन् । उनले शल्यक्रिया भएको दिनदेखि नै आफूले जीवित भएको अनुभव गरेको बताए । यो कृत्रिम मुटुमा नरम जैविक सामग्री प्रयोग भएको र यसमा रगत जम्ने सम्भावना कम हुन्छ । साथै यसलाई शरीरको रोगप्रतिरोधात्मक क्षमताले अस्वीकार गर्ने सम्भावना पनि कम हुन्छ । यसमा लिथियमको ब्याट्री प्रयोग भएको छ । यी बिरामीले यी ब्याट्री चार्ज गर्न भुल्न नहुने बताए । उनले आफूसँग यस विषयमा सम्झनाका घण्टाघण्टाको चार्ट भएको र यो जटिल पनि नभएको बताए । उनले अहिले आफूमा १०० वर्षसम्म बाँच्छुकी भन्ने आशा पलाएको बताए । यी व्यक्तिमा शल्यक्रिया गर्ने प्राध्यापक ड्यानियल दुभुले युरो वन रेडियोलाई आफ्ना बिरामीले साइकल चलाएको देख्दा आफूलाई निकै आश्चर्य लागेको बताउनुभयो । उहाँले बिरामीको पुनस्र्थापनाका साथमा आपूmहरूले यी विरामीलाई अनेकौँ शारीरिक अभ्यास गराएको र त्यसमा शारीरिक अभ्यास गर्ने साइकल पनि परेको बताउनुभयो । उहाँले यी बिरामीले आफूसँग पराम्परागत साइकल भएको तर आफूले सकेसम्म उचाइमा साइकल नलग्ने गरेको बताएको जानकारी दिनुभयो । प्राध्यापक दुभुले आफ्ना विरामी ‘जुडोका’मा ‘ब्ल्याक बेल्ट’ भएको र आफ्नो शारीरिक खेल पुनः आरम्भ गर्न चाहेको बताएको उल्लेख गर्नुभयो । उहाँले यस्तो खेल आरम्भ गर्नुपूर्व चिकित्सकको सल्लाह लिन बिरामीलाई आग्रह गरिएको बताउनुभयो । युरोप तथा अमेरिकाका करिब एक लाख मानिसलाई मुटुको प्रतिस्थापन आवश्यक देखिएको कार्मटले उल्लेख गरेको छ । यस संस्थाले मृत्युनजिक पुगेका चार बिरामीमा पहिलो चरणको कृत्रिम मुटु परीक्षण गर्ने योजना बनाएको छ । दोस्रो चरणमा २० विरामीमा यस प्रकारको कृत्रिम मुटु प्रतिस्थापन गर्ने योजना यस संस्थाले बनाएको छ ।