३० दलीय गठबन्धनले सुरु गरेको तीन दिने आम हड्तालको पहिलो दिन आज विहानैदेखि काठमाडौं उपत्यका लगायत देशैभरको जनजीवन प्रभावित भएको छ । बन्दकर्ताले विहान सबेरै विभिन्न सवारी साधनमा तोडफोड गरेका छन् भने काठमाडौंमा भित्री गल्लीका पसलहरु पनि बन्द गराउने क्रममा प्रहरीसँग झडप भएको छ । प्रहरीले केही माओवादी कार्यकर्तालाई पक्राउ गरेको छ । बन्दकर्ताले बा.१.च. ९४८७ नम्बरको पाउरोटी बोकेको भ्यान तोडफोड गरेका छन् । यस घटनामा दुई जना पक्राउ परे । यस्तै ललितपुरको कुमारीपाटी क्षेत्रमा पनि प्रदर्शनकारीेले एक ट्याक्समिा आगजनी गरेका छन् । बन्दका कारण लामो तथा छोटो दूरीका सवारी साधन रोकिएका छन् । तीस दलीय मोर्चाले सरकार संविधान निर्माणमा पेलेर जाने मनस्थितिमा रहेको भन्दै दबाबमूलक तीन दिने आम हड्ताल आयोजना गरेको हो । यस बन्दलाई माओवादीका अन्य घटकहरुले समेत समर्थन गरेका छन् ।