पाकिस्तानी स्कुलेबालिका मलाला युसफजईले बुधबार सबैभन्दा कम उमेरकी पुरस्कार विजेताका रूपमा नोबेल शान्ति पुरस्कार प्राप्त गरिन् भने उनले यो पुरस्कार भारतीय बालअधिकारवादी अभियान सञ्चालक कैलाश सत्यार्थीसँग साझेदारी गरिन् छ । नर्वेको नोबेल समितिका अध्यक्ष थोर्बजोर्न जगल्यान्डले एउटी युवा बालिका तथा एउटा प्रौढ पुरुष, एक पाकिस्तानी र अर्का भारतीय, एक मुसलमान तथा अर्का हिन्दु, दुबैले विश्वलाई बढी एकता, मुलुकबीच भाइचारा आवश्यक छ भन्ने सङ्केत गरेको बताउनुभयो । सन् २०१२ को अक्टोबर महिनामा बालिकाको शिक्षाको अधिकारका लागि अडानका कारण तालिवानले गोली प्रहार गरी हत्या गर्ने प्रयास गरिएकी १७ वर्षीय मलाला विश्वव्यापी पहिचान बनेकी छन् । मलालालाई हालसम्म निकै पुरस्कार प्राप्त भएका छन् भने उनलाई संयुक्त राष्ट्र सङ्घदेखि बकिङघम राजप्रासादसम्म प्रशंसा र सम्मान प्राप्त भएको छ । पुरस्कार समारोहको पूर्व सन्ध्यामा उनले आफू एक दिन आफ्नो मुलुकको प्रधानमन्त्री बन्ने चाहना व्यक्त गरिन् । पुरस्कार समारोहअगाडि मलालाले ओस्लोमा छ देखि १४ वर्षका सात हजार बालबालिकासँग भेट गरिन् । मङ्गलबार उनले एक प्रेस सम्मेलनमा विश्वका धेरै भागमा बालबालिकालाई आईप्याड वा कम्प्युटरभन्दा एक पुस्तक तथा एक कलम आवश्यक भएको बताइन् । साठी वर्षीय सत्यार्थीले हजारौँ बालबालिकालाई दासत्वबाट मुक्त गरेको उनको ३५ वर्षे सङ्घर्षलाई नोबेल समितिले समर्थन गरेको छ । उनले विश्वको एक साताको सैनिक खर्चले सबै बालबालिकालाई कक्षा कोठामा पु¥याउनसक्छ भने आफूले विश्व गरिव भएको स्वीकार गर्न नसक्ने बताए । मलालाले पुरस्कार प्राप्त गरेपछि आफूले प्रत्येक बालबालिकालाई विद्यालय पठाउन निरन्तर सङ्घर्ष गर्ने बताइन् । उनले प्रश्न गरिन् ः ‘‘वयस्कको विश्वले यी प्रश्न बुझ्नसक्छ तर बालबालिका बुझ्दैनन् । युद्ध गर्नसक्ने बलिया मुलुक शान्ति स्थापना गर्न किन सक्दैनन् ? बन्दुक वितरण गर्न किन सजिलो छ र पुस्तक वितरण गर्न किन कठिन ? ट्याङ्क बनाउन किन सजिलो छ विद्यालय बनाउन किन कठिन ?’’