व्यवस्थापिका संसद्को सुशासन तथा अनुगमन समितिले काठमाडौं विश्वविद्यालयको एमडीको प्रवेश परीक्षामा अख्तियारको हस्तक्षेपबारे छानबिन गर्न पाँच सदस्यीय उपसमिति गठन गरेको छ ।

समितिको मंगलबार बसेको बैठकले छानबिन उपसमिति गठन गरेको हो । उपसमितिलाई १० दिनको समय दिइएको छ ।

समितिले बैठकमा छलफलका लागि बोलाएकोमा अख्तियार दुरुपयोग अनुसन्धान आयोगका प्रमुख आयुक्त लोकमानसिंह कार्की अनुपस्थित हुनुभएको छ । स्वास्थ्य समस्या भएको भन्दै कार्की समितिको बैठकमा अनुपस्थित हुनुभएको हो । अख्तियारका प्रमुख आयुक्त कार्कीले समितिलाई पत्र पठाएर आफ्नो घाँटीमा समस्या देखिएको र डाक्टरले एक हप्तासम्म बोल्न नहुने भनेकाले आफू उपस्थित हुन नसक्ने जानकारी गराएको समितिले जनाएको छ ।

काठमाडौं विश्वविद्यालयको एमबीबीएस र एमडीको प्रवेश परीक्षामा अख्तियारले गरेको हस्तक्षेपबारे छलफल गर्न समितिले कार्कीलाई बोलाएको थियो । प्रमुख आयुक्त कार्की उपस्थित नभए पनि आयोगका कर्मचारीहरु भने समितिको बैठकमा पुगेका थिए । अख्तियारको तर्फबाट बैठकमा शान्तराज सुवेदी, वेगेन्द्रराज शर्मा, कानुनविद् भानुभक्त  पोखरेल, प्रवक्ता  कृष्णहरि पुष्करलगायत कर्मचारी उपस्थित भएका थिए ।

समितिले यसअघि काठमाडौं विश्वविद्यालयका पदाधिकारीहरुसँग छलफल गरेको थियो ।