ठुला दललाई भोट दिनु भनेको साँढेको अगाडि दूधको बाल्टी थाप्नु जस्तै : लिङदेन


चैत २२, भैरहवा । राष्ट्रिय प्रजातन्त्र पार्टी (राप्रपा)का अध्यक्ष राजेन्द्र लिङदेनले नेपालका ३ ठुला दल नामले अलग पार्टी भए पनि विचार र व्यवहारले अलग नभएको बताएका छन् । 

राष्ट्रिय प्रजातन्त्र पार्टी रुपन्देहीद्वारा भैरहवामा आयोजित विशाल आमसभा तथा पार्टी प्रवेश कार्यक्रममा सम्बोधन गर्दै अध्यक्ष लिङदेनले बैदेशिक हस्तक्षेप भित्राउनमा ३ दल लागेको बताउँदै हिंसामा विश्वास नगर्ने राप्रपाले यिनीहरूको बाकस खाली गरेर जनता बाटो भएको देखाउनु पर्ने ठिक समय आएको बताए । 

पर्खने र हेर्ने समय नभएको भन्दै उनले जनता सार्वभौम रहेकाले विवेकले काम गर्न सक्छ भनेर प्रमाणित गर्नु पर्ने बताए । उनले एमाले, माओवादी, कांग्रेसलाई भोट दिएर देश बन्छ भन्ने आशा गर्नु भनेको साढेको अगाडि दूधको बाल्टी लिनु जस्तै भएको बताए । 

ठुला भनिएका पार्टीको काम तीन दशकमा देखिसकेको बताउँदै उनले २–४ वटा घर र भ्युटावर देखाएर विकास गरेको प्रमाणित गर्न खोजेको बताए । 

‘सामान्य आँखाले देखे जस्तो देशको अवस्था नरहेको उनले बताए । गोली चलेको छैन, बन्द हडताल भएको छैन तर देशमा ३ वटै अंगले काम नगरेको अवस्था छ । सिटामोल पनि उपलब्ध गराउन नसक्ने अवस्थामा रहेका नेपालमा अदालतको आदेशमा सिटामोल दिनु पर्ने अवस्था छ, उनले भने ।’

यो समाचार पढेर तपाईको प्रतिक्रिया के छ ?