अष्ट्रेलियामा हुन्डीको नाममा नेपालीको लाखौं डलर ठगी गरेका केसी पक्राउ !


Photo Credit : Bharat KC’s Facebook

अष्ट्रेलियामा विगत ७ वर्षदेखि विभिन्न बहाना र नाममा ठगी गर्दै आएको आरोपमा प्रहरीले एक नेपालीलाई पक्राउ गरेको छ । भिक्टोरियाको मेलबर्नमा बसोबास गर्ने भरत केसी पक्राउ परेका हुन् । उनले नेपालीहरुसँग हुन्डीमार्फत नेपालबाट पैसा ल्याइदिने, नेपालमा पैसा पठाइदिने भन्दै ठगी गर्दै आएका थिए ।

एमएनटीभीसँग सम्पर्कमा आएका र प्रहरीमा उजुरी गरेका ११ जनाको मात्रै करिब दुई लाख डलर निजले ठगेका थिए । यसबाहेक समूदायको सम्पर्कमा रहेका कूल २६ जनाभन्दा बढीको यिनले हजारौं डलर ठगेका छन् । निज केसीबाट विद्यार्थीहरु पनि पीडित थिए । विद्यार्थीहरुले युनिभर्सिटी र कलेजमा तिर्नका लागि नेपालबाट मगाएको पैसा पनि निजले ठगी गरेर रुन बाध्य बनाएका थिए ।

विशेष श्रोतबाट प्राप्त जानकारी अनुसार प्रहरीले निज भरत केसीलाई गत बिहीबार पक्राउ गरेको हो । निजलाई ठगीको आरोपमा पक्राउ गरिएकोमा अनुसन्धान पूरा गरी नोभेम्बरमा अदालतमा पेश गरिने बुझिएको छ ।

निज केसीले गत जुन १२ तारिखमा नेप्लीज एशोसिएसन अफ भिक्टोरिया, एनआरएन भिक्टोरिया, समूदायका अगुवाहरुसँगको कुराकानीमा आफुले एक महिनाभित्र उजुरी गरेका पीडितहरुको ५० प्रतिशत रकम बुझाउने र बाँकी रकम विस्तारै तिर्दै जाने सहमति गरेका थिए । केसीले अबदेखि यस्तो कारोबार नगर्ने लिखित प्रतिबद्धता समेत जनाएका थिए । तर, लगत्तैदेखि फेरि अन्य नेपाली विद्यार्थीहरुलाई ठगेका घटनाहरु आएका थिए । निजले प्रतिबद्धता अनुसार एकमहिना पछि पनि पैसा फिर्ता गरेका थिएनन् । पीडितहरुले नेपाली दूतावास क्यानबेरा, भिक्टोरियास्थित नेपाली महावाणिज्यदूतको कार्यालयमा समेत आफ्नो उजुरी दर्ता गराएका थिए ।

हाम्रो फलोअप निरन्तर जारी छ ।

यदि तपाईं पनि हुन्डीको नाममा निज भरत केसीबाट ठगिनुभएको छ भने कृपया मेलबर्नको फकनर पुलिस स्टेशनको नम्बर (03) 9355 6000 मा सम्पर्क गर्नुहोस् । अथवा [email protected] मा ईमेल गरी आफ्नो उजुरी दर्ता गराउनुहोस् । तपाईं जुनसुकै स्टेटमा भएपनि निजले तपाईंलाई ठगेको छ भने ईमेलमार्फत उजुरी गर्न सक्नुहुन्छ । एमएनटीभी अष्ट्रेलिया अष्ट्रेलियामा गैरकानूनी कार्य गर्ने र समूदायलाई नै विभिन्न अपराधिक गतिविधिबाट दुःख दिनेहरुलाई कारवाही गराउने कार्यमा तपाईंहरुसँग हातेमालो गर्न प्रतिबद्ध छ ।

ठगी मात्र गर्दैनथे केसी

निज केसीले कसरी अपराध गर्दथे भन्ने सबै नेपाली समूदायले बुझ्न आवश्यक छ । निजले कुनै व्यक्तिले नेपालबाट पैसा ल्याउन चाहेको विभिन्न पेज र फेसबुक ग्रुपमार्फत जानकारी संकलन गर्थे । तिनीहरुलाई मेसेन्जरमार्फत आफुले नेपाल पैसा पठाउनुपर्ने भन्दै सम्पर्क गर्दथे । यता नक्कली चेक जम्मा गरेर त्यसको स्क्रिनसट पठाउने र उता आफ्नो व्यक्तिहरुको खातामा पैसा जम्मा गर्न लगाउने गर्दथे ।

नक्कली चेक भएपनि खातामा पैसा आउँदै गरेको देखाउने भएकोले मानिसहरु सजिलै झुक्किन्थे । यस्तै नेपालमा पनि पैसा नै नभएको चेक जम्मा गरेको डिपोजिट स्लीपको स्क्रिनसट पठाएर यहाँ पैसा जम्मा पारेर सम्पर्क विहीन हुने गरेका थिए । पछि सम्पर्कमा आएको बेला विभिन्न बहाना गरी, थोरै थोरै पैसा फिर्ता गरी झुलाउने गरेका थिए । निजले एकैजनाबाट ३० हजार डलरसम्म ठगी गरेको फेला परेको छ ।

यो समाचार पढेर तपाईको प्रतिक्रिया के छ ?