अन्तर्राष्ट्रिय जगतको सुरक्षा चासो जायज, सबै किसिमको आतंकवादका विरुद्ध नेपाल रहेको जनाउ


उपप्रधान तथा गृहमन्त्री विमलेन्द्र निधिले आतङ्कवाद विश्वव्यापी रुपमा गम्भीर चुनौतीका रुपमा देखिएको उल्लेख गर्दै त्यस्ता गतिविधि नियन्त्रणका लागि उच्चस्तरको प्रतिबद्धता जनाउनुपर्ने बताउनुभएको छ । नयाँदिल्लीमा सुरु भएको प्रतिआतङ्कवादसम्बन्धी तेस्रो अन्तर्राष्ट्रिय सम्मेलनको उद्घाटनका अवसरमा गृहमन्त्री निधिले अन्तर्राष्ट्रिय समुदायका लागि सुरक्षा चासो सबैभन्दा चिन्ताको विषय भएको उल्लेख गर्नुभयो ।

उहाँले आतङ्कवादी समूहले आफ्नो प्रभाव विस्तार गर्न खाजेकाले त्यसको रोकथामका लागि सबै राष्ट्र मिलेर बलियो कानुनी संयन्त्र बनाउनुपर्नेमा जोड दिनुभयो । राष्ट्रिय, क्षेत्रीय र अन्तर्राष्ट्रिय सुरक्षा संयन्त्र बलियो नबनाएसम्म आफ्ना नागरिकको सुरक्षा गर्न कठिन हुने निधिको भनाइ थियो । एक दशकअधि इराक र केही वर्षअघि काबुलमा क्रुर तरिकाबाट मारिएका नेपालीको प्रसङ्ग उल्लेख गर्दै उहाँले त्यस्ता गतिविधिले कुनै पनि समाजको प्रगति र देशको विकास हुन नसक्ने बताउनुभयो ।
गृहमन्त्री निधिले सबै किसिमका आतङ्कवादविरुद्ध नेपाल भएको बताउँदै प्रतिआतङ्कवाद रणनीति तयार गर्नुपर्नेमा जोड दिनुभएको उपप्रधानमन्त्री निधिका प्रेस संयोजक रामजी दाहालले जानकारी दिनुभयो । भारतका उपराष्ट्रपति हमिद अन्सारी प्रमुख अतिथि रहनुभएको कार्यक्रमका प्रमुख वक्तामा श्रीलङ्काका प्रधानमन्त्री रलिन विक्रमा सिङ्गे, नेपालका उपप्रधान तथा गृहमन्त्री निधि, भारतका रेल्वे मन्त्री सुरेश प्रभू र हरियाणाका मुख्यमन्त्री मनोहरलाल खत्तर हुनुहुन्छ । सम्मेलन आगामी बिहीबारसम्म चल्नेछ । यसैबीच निधिले भारतका पूर्वप्रधानमन्त्री मनमोहन सिंहसँग भेटवार्ता गरेका छन् ।

यो समाचार पढेर तपाईको प्रतिक्रिया के छ ?