वागमती सरसफाइ महाअभियानको सयाँै हप्तामा काठमाडौँको सुन्दरीजलबाट सुन्दरीघाटसम्मको वागमती किनारामा यही चैत २८ गते शनिबार ६० हजारभन्दा बढी सर्वसाधारण सहभागी हुने मानव साङ्लो निर्माण गरिने भएको छ । दिन प्रतिदिन दुर्गन्धित बन्दै गएको वागमतीलाई सफा बनाउने महाअभियान वि.सं.२०७० जेठ ५ गते शनिबारदेखि सुरु भएको सय हप्ता पुगेको अवसर पारी मानव साङ्लो निर्माण गर्न लागिएको हो । सुन्दरीजलबाट सुन्दरीघाटसम्मको २८ किलोमिटर वागमती नदी किनारामा दुबैतिर मानव साङ्लो निर्माण गरी वागमती सफाइका लागि सामूहिक प्रतिबद्धता व्यक्त गरिनेछ । महाअभियानका सम्बन्धमा जानकारी गराउने उद्देश्यले प्रधानमन्त्री तथा मन्त्रिपरिषद्को कार्यालयमा आज आयोजित पत्रकार भेटघाट कार्यक्रममा मुख्य सचिव लीलामणि पौड््यालले सरसफाइ आफ्नै लागि हो भन्ने सर्वसाधारणमा चेतना अभिबृद्धि गर्नु आवश्यक भएको बताउनुभयो । महाअभियानको सम्बन्धमा जानकारी गराउँदै उहाँले भन्नुभयो, “सरसफाइ सभ्यताको पहिलो सूचक हो । महाअभियान समाजप्रतिको व्यक्तिको उत्तरदायित्वबोधका साथै आफ्नै लागि मात्रै गर्ने मानसिकताविरुद्धको अभियान पनि हो ।” वागमती सरसफाइ महाअभियानका कारण पछिल्ला समयमा काठमाडौँका १३ भन्दा बढी स्थानमा साप्ताहिक सरसफाइको कार्यक्रम पनि चलिराखेको र देशका विभिन्न भागमा यसको प्रभाव परेको उहाँको भनाइ छ । जल तथा ऊर्जा आयोगका सचिव गजेन्द्र ठाकुरले वागमती सरसफाइ महाअभियान वर्तमान अवस्थासम्म आइपुग्दा यसमा ९५९ संस्थाहरू तथा दुई लाख ८० हजार व्यक्ति सहभागी भएको र करिब २,८०० मेट्रिक टन फोहोर वागमतीबाट निकालिसकिएको जानकारी गराउनुभयो । अभियानका अभियन्ता डा राजु अधिकारीले महाअभियानको सुरुमा वागमतीको सरसफाइ असम्भव भन्नेहरूमा पनि पछिल्ला समयमा गरेपछि हुँदो रहेछ भन्ने भावना जागृत हुनसक्नु सकारात्मक पक्ष भएको बताउनुभयो । उहाँका अनुसार मानव साङ्लो निर्माणका लागि सुन्दरीजलदेखि सुन्दरीघाटसम्मका वागमती नदीका दुवै किनारामा विभिन्न १४ वटा क्षेत्रहरू तय गरिएका छन् । कार्यक्रममा विभिन्न सञ्चारमाध्यमका पदाधिकारी तथा प्रतिनिधिहरूले वागमती सरसफाइ महाअभियानको सफलता सबैको सहयोगमा सम्भव हुने भएका कारण यसको प्रचारप्रसारमा आआफ्नातर्फबाट सक्रिय सहयोग पु¥याउने प्रतिबद्धता व्यक्त गर्नुभएको थियो ।